Cavab verməzdən əvvəl nəzər-diqqətinizi sübut olunmuş elmi bir mövzuya cəlb edirik:

Bildiyimiz kimi, su öz zatında odun düşmənidir və yanğının qarşısını almaq üçün ən münasib bir vasitə kimi sudan istifadə olunur. Amma həmin suyun tərkibi hidrogen və oksigendən ibarətdir. Katalizator vasitəsi ilə su özünün təşkiledici maddələrinə – oksigenə və hidrogenə ayrılsa, onlardan birinə (hidrogenə) od dəyməklə eyni zamanda partlayır, digəri isə (oksigen) odu şölələndirir. Yəni bu iki maddə ayrı-ayrılıqda suyun gördüyü işin tam əksinə əməl edirlər. Halbuki, su bu iksinin kimyəvi tərkibindən əmələ gəlmişdir. Bu mövzunun səbəb-nəticə qanunu ilə heç bir ziddiyyəti yoxdur.

Qeyd olunan məsələyə diqqət yetirməklə bilmək lazımdır ki, hal-hazırda elmdə sübut olunmuşdur ki, bu kimi dəyişikliklər qeyri-mümkün deyildir. Qəbul olunan elmi bir prinsipə əsasən “maddə və enerji heç vaxt aradan getmir; daimi olaraq bir-birinə çevrilir”. Buna əsasən, demək olar ki, odda mövcud olan enerjinin maddəyə çevrilməsi mümkündür və elmi cəhətdən qeyri-mümkün hesab olunmur. Əgər təbii şəraitdə odun gülə, bitkiyə çevrilməsi adi camaat üçün qəbul oluna bilməyən bir məsələ və başqa sözlə desək, “adi cəhətdən qeyri-mümkün” sayılırsa, amma belə bir dəyişiklik elmi cəhətdən qeyri-mümkün deyildir. Bəşərin də gələcəkdə bu işi görə bilməsi mümkündür. Əlbəttə, o zamanda da enerjinin maddəyə çevrilməsində insanın qüdrəti məhdud olacaq və uzun müddət keçdikdən sonra bəlkə maddənin yalnız cüzi bir hissəsini enerjidən istehsal edə bilər.

Amma Pərvərdigari-aləm qeyri-məhdud, sonsuz qüdrət sahibi və hər bir mümkün işə qadir olduğundan, enerjinin böyük həcmini bir göz qırpımında və çox sadə şəkildə istədiyi hər bir maddəyə çevirə bilər. Bu iş İbrahim (əleyhis-salam)-ın yandırılması hadisəsində baş verdi və nəmrudçuların yandırdığı böyük həcmli od bir göz qırpımında gülüstana çevrildi. Bununla eyni zamanda səbəb-nəticə qanununda heç bir xələl yaranmadı. Çünki yandıran o od gülüstana çevrilsə, artıq ilkin xassələri onda olmayacaq ki, bir şəxsin onda yanmadığına görə təəccüblənmiş olaq. Odun qarşısını alan suda oksigenlə hidrogenin tərkibindən xüsusi xassə əmələ gəlir. Amma hər vaxt bu tərkib dəyişilsə, odun qarşısını almır, üstəlik odun şölələnməsinə də kömək edir.

Əqli nəzərdən qeyri-mümkün olmayan belə hallarda bəşərin qüdrəti bu işi əncam verməkdə, yaxud sürətləndirməklə məhduddur. Əgər insanların gözləri önündə baş versə ona “möcüzə” adı veriləcəklər.