حضرت علی اکبر﴿ع﴾ کے والد گرامی[1] حضرت امام حسین بن علی بن ابیطالب ﴿ع﴾ اور ان کی والدہ محترمہ لیلی بنت ابو مرة بن عروة بن مسعود ثقفی ہیں۔[2]
حضرت علی اکبر﴿ع﴾ ایک نامور اور شریف قبیلہ، بنی ہاشم سے تعلق رکھتے تھے اور اس طرح در حقیقت پیغمبر اسلام ﴿ص﴾ حضرت فاطمہ زہراء ﴿س﴾، امیرالمؤمنین علی بن ابیطالب اور اپنے والد گرامی امام حسین﴿ع﴾ کے قبیلہ ﴿بنی ہاشم﴾ کے چشم و چراغ تھے۔
حضرت علی اکبر﴿ع﴾ نے عاشورا کے ماجرا میں فعالانہ کردار ادا کیا ہے اور تمام حالات میں اپنے والد گرامی حضرت امام حسین﴿ع﴾ کے دوش بدوش دشمنوں کے ساتھ مبارزہ اور جنگ کر رہے تھے۔ وہ عاشورا کے دن بنی ہاشم اور آل ابیطالب کے پہلے شہید تھے۔[3]
حضرت علی اکبر﴿ع﴾ صاحب ہمسر و اولاد تھے یا نہیں؟ اس سلسلہ میں دو نظریات پائے جاتے ہیں:
پہلا نظریہ یہ ہے کہ بعض اشخاص نے کہا ہے کہ وہ صاحب اولاد  نہیں تھے، ایسے افراد نے ان کی شریک حیات کے بارے میں کچھ نہیں کہا ہے۔[4]
دوسرا نظریہ یہ ہے کہ کچھ اشخاص نے  کئی دلائل کی بناء پر حضرت علی اکبر﴿ع﴾ کے صاحب ہمسر و اولاد ھونا ثابت کیا ہے ۔ ان دلائل میں سے بعض حسب ذیل ہیں:
١۔ حضرت علی اکبر﴿ع﴾ کی جو زیارت ابو حمزہ ثمالی نے حضرت امام جعفر صادق ﴿ع﴾ سے نقل کی ہے، اس میں ایک ایسی عبارت پائی جاتی ہے کہ جس سے معلوم ھوتا ہے کہ حضرت علی اکبر﴿ع﴾ صاحب اولاد تھے،جیسے زیارت کی یہ عبارت:“۔ ۔ ۔ صلی اللہ علیک یا ابا الحسن ثلاثا۔ ۔ ۔ ”[5] « صلى الله علیك و على عترتك و أهل بیتك و آبائك و أبنائك و أمهاتك الأخیار الأبرار الذین أذهب الله عنهم الرجس و طهرهم تطهیرا»؛ اس سلسلہ میں قابل بیان ہے کہ: اگر چہ مذکورہ زیارت کے پہلے اقتباس کو حضرت علی اکبر﴿ع﴾ کے صاحب اولاد ھونا ثابت کرنے کی اطمینان بخش دلیل قرار نہیں دیا جاسکتا ہے، لیکن اس زیارت کا دوسرا حصہ قطعی طور پر دلالت کرتا ہے کہ حضرت علی اکبر﴿ع﴾ صاحب خاندان و اولاد تھے، کیونکہ لفظ“ ابنائک” جمع ہے اور لفظ “عترتک”، کسی کی عترت اس کی ذریت اور اولاد شمار ھوتی ہے۔
۲۔ بز نطی کہتے ہیں:“ میں نے حضر امام رضا ﴿ع﴾ سے پوچھا: کیا کوئی کسی عورت اور اس عورت کے باپ کی صاحب اولاد  کنیز کے ساتھ ازدواج کرسکتا ہے؟ حضرت ﴿ع﴾ نے جواب میں فرمایا : کوئی حرج نہیں ہے۔ میں نے کہا: میں نے آپ ﴿ع﴾ کے والد گرامی سے سنا ہے کہ، انھوں نے فرمایا کہ امام سجاد ﴿ع﴾ نے امام حسن﴿ع﴾ کی بیٹی سے ازدواج کرنے  کے علاوہ، آپ ﴿ع﴾ کی ام ولد ﴿صاحب اولاد کنیز﴾ سے بھی ازدواج کی تھی۔ ۔ ۔امام ﴿ع﴾ نے جواب میں فرمایا: جیسا تم کہتے ھو، ویسا نہیں ہے، بلکہ امام سجاد ﴿ع نے امام حسن ﴿ع﴾ کی بیٹی سے ازدواج کی اور اس کے علاوہ اپنے بھائی علی بن الحسین ﴿ع﴾ کی ام ولد ﴿صاحب اولاد کنیز﴾ سے ازدواج کی ہے، جو کربلا میں قتل ﴿شہید﴾ کئے گئے۔[6]
سند کے لحاظ سے اس روایت میں موجود شخصیتیں ثقہ ہیں [7]اور محتوی کے لحاظ سے بھی اس روایت سے معلوم ھوتا ہے کہ حضرت علی اکبر﴿ع﴾ کی ایک کنیز سے اولاد تھی۔
پس مذکورہ بیان کے مطابق، حضرت علی اکبر﴿ع﴾ صاحب ہمسر و فرزند تھے، لیکن جو تحقیق ہم نے اس سلسلہ میں انجام دی حضرت علی اکبر﴿ع﴾ کی ہمسر کے نام اور تفصیلات کے بارے میں کچھ معلوم نہ ھوسکا۔

---